د بغلان سیمه ییز چارواکي وايي، د دغه ولایت په نهرین ولسوالۍ کې د طالبانو د برید پرمهال ۲۶ ولسي پاڅونوال وژل شوي او ۸ نور ټپیان شوي دي.
د نهرین ولسوال فضل الدین مرادي نن شنبه د «چنګاښ پر۸مه» امریکا غږ ته وویل، چې پېښه د دغه ولسوالۍ په کوهګدای سیمه کې د ولسي پاڅونوالو پر امنیتي پوستو د برید پرمهال رامنځته شوې ده.
نوموړي زیاته کړه :"تېره شپه وسله والو طالبانو غوښتل د نهرین ولسوالۍ پر مرکز برید وکړي، خو د برید پر وخت یې پلان تغیر کړی و او د ولسوالۍ پر ځینو پوستو یې برید وکړ."
هغه وویل، چې تر برید لاندې امنیتي پوستو د مرستې لپاره ولسي پاڅون کوونکي وسله وال چې د دولت په طرفدارۍ یې د وسله والو طالبانو په مقابل کې وسلې اخیستي ور روان وو چې طالبانو پرې برید کړی.
ولسوال مرادي وايي، په دغه برید کې د ولسي پاڅون کوونکو ۲۶ تنه وژل شوي او ۸ تنه نور ټپیان شوي دي.
د بغلان په نهرین ولسوالۍ کې عامو خلکو د دولت په ملاتړ د وسله والو طالبانو پر ضد وسله اخیستې چې امکانات ورته افغان دولت ورکوي.
د نهرین ولسوال ښاغلی مرادي وايي چې د طالبانو دغه ډله په مجهزو وسلو سنباله وه او د لایزري وسلو په ذریعه یې برید کړی و.
نوموړی وايي چې د وسله والو طالبانو هم څو تنه په جګړه کې وژل شوي خو دقیق ارقام یې نه دي معلوم.
وسله والو طالبانو بیا د یاد برید د مسؤلیت په منلو سره په دغه ولسوالۍ کې د درې امنیتي پوستو د نیولو او ۲۸ پاڅونوالو د وژلو ادعا کړې ده.
د بغلان امنیتي چارواکو تر دا مهاله په دې اړه تبصره نه ده کړې.
