د لاس رسي وړ اتصالات

هند د چمپينز ټرافي سیالیو اتل شو


روهیت شرما د لوبې غوره لوبغاړی شو
روهیت شرما د لوبې غوره لوبغاړی شو

د هند د کرکټ ملي لوبډلې د یکشنبې په ورځ مارچ نهمه (کب ۱۹) په دوبۍ کې د چمپینز ټرافي په پایلوبې کې د نیوزلنډ د کرکټ ملي لوبډلې ته ماتې ورکړه او د دغو سیالیو اتلولي یې وګټله.

په پایلوبې کې نیوزلنډ په ټاکل شویو ۵۰ اورونو کې هند ته د ۲۵۲ منډو هدف وټاکه.

د نیوزلنډ په توپ وهونکو کې تر ټولو ډېرې منډې ډاریل مچیل وکړې چې ۶۳ وې. بل لوبغاړي میچل برایسویل یې هم ۵۳ وکړې، خو د لوبډلې د بري لپاره یې کافې نه وي.

د هند کولديپ یادوف او وارون چکراورتي د نیوزلنډ دوه-دوه لوبغاړي وسوځول.

هند دا هدف په ۴۹ اوورونو کې پوره کړ او اتلولي یې خپله کړه.

د هند د لوبډلې کپتان روهیت شرما ۷۶ وکړې او د خپلې لوبډلې په بري کې یې اغیزناکه ونډه واخیسته. دی د دغې لوبې غوره لوبغاړی شو.

دا درېیم ځل دی چې هند د چمپینز ټرافي اتلولي ګټي.

د نیوزلنډ لوبغاړي راچین رويندرا په دغو سیالیو کې ۲۶۳ منډې وکړې او د دغو سیالیو غوره منډه کوونکی ونومول شو.

د چمپینز ټرافي سیالۍ د فبرورۍ په ۱۹مه د پاکستان په کوربتوب کې په پاکستان او متحدو عربو اماراتو کې پيل شوې.

هند پاکستان ته خپله لوبډله ونه استوله او د هغوی ټولې لوبې په دوبۍ کې وشوې.

د چمپینز ټرافي په سیالیو کې د افغانستان په ګډون، هند، نیوزلنډ، جنوبي افریقا، استرالیا، پاکستان او بنګله دېش لوبډلو برخه اخیستې وه. افغانستان په کې یوه لوبه وګټله، یوه یې وبایلله او بله یې د باران له کبله بشپړه نه شوه. دا اتلولي په هرو څلورو کلونو کې د نړۍ د اتو غوره لوبډلو ترمنځ یو ځل کېږي.

فورم \ دبحث خونه

XS
SM
MD
LG