پداسې حال کې چې امریکا پر فلسطین خپلې مرستې درولي، قطر لمړنی مسلمان هیواد دی چې فلسطین سره ستره مالي مرسته کوي.
قطر له فلسطینیانو سره د ۱۵۰ میلیونه ډالرو مرسته اعلان کړې ده. د قطر د بهرنیو چارو وزارت وايي دا مرستې د قطر خیریه بنسټ سمبالوي.
قطر وايي دا مرستې به د اسرائیلو تر محاصرې لاندې په غزه کې د بشري ناورین د مخنیوي لپاره ولګول شي. د ملګرو ملتونو سازمان به د دغو مرستو وېش څاري.
قطر تر دې مخکې د حماس تر ولکې لاندې غزې کې فلسطینیانو سره د ۶۰ ډالرو په ارزښت تیل هم ورکړي وو چې په غزه کې د برېښنا یوازینی ستیشن فعال شي.
اسوشیتډپرس وايي د غزې اوسېدونکو په ۲۴ساعتونو کې یوازې څلور ساعته برېښنا لرله. راپورونه وايي چې د اسرائیلو د یولس کلنې محاصرې له کبله په غزه کې یو بشري ناورین روان دی.
د غزې اوسېدونکو د اسرائیلو د محاصرې پر ضد په تېرو څو میاشتو کې ډېر مظاهرې وکړې چې له کبله یې سلګونه کسان ووژل شول او ژوبل شول. قطر د حماس له ډلې له مشرانو سره نژدې اړیکې لري او همدا اوس د دغې ډلې مخکنی مشر خالد مشعل په قطر کې دی. سعودي له قطر سره ډیپلوماتیکې اړیکې شلولي او دا هېواد یې د اورپکو په ننګې تورن کړی دی.
امریکا څو میاشتې مخکې بیت المقدس د اسرائیلو د پلازمینې په توګه په رسمیت وپېژنده او هغه مرستې یې هم بندې کړې چې د ملګرو ملتونو له لارې پر فلسطیني کډوالو وېشل کېدې.
