ملګري ملتونه وايي له میلیونونه فلسطيني کډوالو سره به د بشري مرستو لپاره نړیوال کمپاین پیلوي.
د امریکا د بهرنیو چارو وزارت اعلان کړی چې د فلسطيني کډوالو سره د مرستو رسولو له ادارې سره یې مالي مرستې تر نیمايي هم زیاتې کمې کړې.
امریکا د ملګرو ملتونو د کار او خيرښېګڼې له ادارې سره د کال ۱۲۵ میلیونه ډالر مرسته کوله چې اوس یې ۶۰ میلیونو ته راټیټه کړې.
د امریکا له دغه اعلان نه وروسته ملګرو ملتونو پر نړیوالو غږ وکړ چې له فلسطینانونو سره مرسته وکړه. واشنګټن وايي چې له دغې ادارې سره د مرستو زیاتول او کمول په وخت پورې تړلي دي.
ملګري ملتونه د غزې په تړانګه کې شاوخوا دوه میلیونه کډوالو سره بشري مرستې کوي. د ملګرو ملتونو د خیر ښېګڼې ادارې کمېشنر-جنراال پیيري کراهینبول وايي چې اوس به د نړۍ پر نورو هېوادونو غږی کوي چې مرستې وکړي او همدغه راز د پېسو ټولولو یو نړیوال کمپاین به هم پیلوي.
ددغه کار هدف دا دی چې په ۲۰۱۸ او له هغه وروسته هم د فلسطیني کډوالو لپاره اوسنۍ بشري مرستې هماغسې روانې وساتل شي، کلینیکونو او ښوونځي هم پرانیستتي پاتې شي.
نوموړي وویل په اردن، لبنان، سوریه او د غزې په تړانګه کې میلیونونه فلسطینیان بشري مرستو ته ضرورت لري او د سپېنې ماڼې دغه پرېکړه د دغو کډوالو بشري خدمتونه له خطر سره مخامخ کوي.
له ملګرو ملتونو سره د امریکا د مرستو د کمولو یوه بله اغیزه د رویترز خبري اژانس په وینا په منځني ختیځ کې پر امنیتي حالاتو باندې هم کیدای شي اثر وکړي او نور افراطیت هم وزېږوي.
د جنورۍ په دویمه نيټه ولسمشر ټرمپ په خپل یو ټویټ کې ولیکل چې امریکا فلسطینیانو ته د کال میلیونونه ډالر ورکوي خو مننه او درناوی یې نه کیږي. ښاغلي ټرمپ لیکلي که فلسطینیان د سولې خبرې نکوي، نو ولې ورته پېسې ورکړو؟
خو امریکايي چارواکي وایي د مرستو کمول د ښاغلي ټرمپ په ټویټ پورې تړلې نه دي. وايي امریکا له کلونو راهېسې ملګرو ملتونو میلیونونه ډالره ورکوي چې باید نور هېوادونه هم خپلې ونډې زیاتې کړې.
د فلسطین د ازادۍ د غورځنګ یو غړي حنان عشراوي رویټرز ته وویل چې چې سپینې ماڼۍ فلسطینیان له خوږې ګوتې ونیول. د اسرایلو صدر اعظم هم د ملګرو ملتونو پر دغې ټولنې د مرستو د کمولو غوښتنه کړې وه، خو ویلي وو چې باید دا کار په تدریجي ډول وشي.
