د متحده ایالاتو جمهور رئیس ډونالډ ټرمپ سه شنبه مارچ ۴ ( کب ۱۴) د کانګرس غړیو ته په وینا کې د هغه شخص نیول کیدل اعلان کړل چې د ۲۰۲۱ کال د اګست په میاشت کې یې د کابل په هوایي ډګر کې په امریکایي ځواکونو ځانمرګی برید طرح کړی و.
ښاغلي ټرمپ پرته له دې چې ووایي دا کس څه وخت نیول شوی او د کوم هیواد دی، د پاکستان د حکومت څخه مننه وکړله چې ددې شخص په نیولو کې یې مرسته کړې.
د متحده ایالاتو جمهور ئیس وویل، "خوښ یم نن شپه د هغه ترهګر نیول کیدل اعلان کړم چې د (کابل په هوایي ډګر کې) د ظالمانه برید عمده مسؤل و. هغه همدا اوس دلته په لار دی چې د امریکا د تیرې تورې عدالت سره مخ شي. د پاکستان حکومت څخه مننه کوم چې ددې شخص په نیولو کې یې مرسته کړې."
د کابل په هوایي ډګر کې په ځانمرګي برید کې چې د اسلامي دولت یا داعش- خراسان څانګې یې د کولو ادعا کړې وه، د ۱۳ امریکایي سرتیرو سربیره ۱۷۰ عام افغانان وژل شوي و.
د امریکا پوځ په لومړي ځل د بریدګر نوم خپور کړی او ویلي یې دي چې عبدالرحمن لوګري نومېده، د داعش ډلې غړی و چې طالبانو د کابل له نیولو وروسته له زندان څخه خوشې کړی و.
سره له دې چې جمهور رئیس ټرمپ په وار وار د افغانستان څخه د امریکایي ځواکونو د وتلو پر مهال د ګډوډۍ ملامتي د مخکني جمهور رئیس جو بایډن اچولې خو د متحده ایالاتو د پوځ مرکزي قوماندانۍ ویلي چې ددې برید مخه نشوی نیول کیدی.
د پاکستان صدراعظم ادعا کړې، چې شریف الله افغان تبعه و او د افغانستان او پاکستان ترمنځ په سرحدي سیمه کې په "بریالیو عملیاتو" کې نیول شوی دی.
د طالبانو د حکومت مرستیال ویاند حمدالله فطرت د ۲۰۲۱ کال د اګست په میاشت کې د کابل په هوايي ډګر کې د داعش-خراسان څانګې د بریدګر د نیولو د خبر په غبرګون کې ویلي چې: "... په پاکستان کې د داعش-خراسان د یوه غړي نیولو دا ثابته کړه چې دا ډله په هغه جغرافیه [پاکستان] کې پټنځایونه او د روزنې مرکزونه لري او دا هم تائید شوې چې داعش-خراسان په افغانستان کې پټنځایونه نلري."
فورم \ دبحث خونه