ملګرو ملتونو په افغانستان کې اړمنو افغانانو ته د بشري مرستو د برابرولو لپاره د بودیجې د کمښت د منفي اغیزو په اړه خبرداری ورکړی او ویلي دي چې دا هیواد د سوډان وروسته په نړۍ کې دوېیم هیواد دی چې نیمايي وګړي یې بشري مرستو ته اړتیا لری.
د ملګرو ملتونو د عمومي منشي ویاند سټیفن دوجاریک د پنجشنبې په ورځ مارچ شپږم (کب ۱۶) نیویارک کې خبري کنفرانس ته په وینا کې وویل چې د بشري مرستو لپاره د بودیجې د کمښت له امله یوازې تیره میاشت په افغانستان له ۲۰۰ څخه زیات روغتیايي مرکزونه تړل شوي، چې ورسره ۱.۸ میلیون کسان د روغتیايي خدمتونو ترلاسه کولو څخه بې برخې شوي دي.
هغه وویل: د بودیجې کمښت له وړاندې د بشرپاله ټولنې هڅې هغوی ته چې مرستو ته اړتیا لري د مرستو برابرول د پام وړ ډول محدود کړي دي. له ۲۰۰ څخه زیات روغتیايي مرکزونه تړل شوي چې له امله یې ۱.۸ میلیون کسان د اړینو روغتیايي خدمتونو څخه بې برخې شوي دي".
سټیفن دوجاریک وویل چې د بودیجې کمښت د خوارځواکۍ د درملنې او مخنیوي پر پروګرامونو باندې هم اغیزه کړې ده.
هغه وویل: "زمونږ د بشري مرستو شریکانو خبرداری ورکړی چې مرستو لپاره د بودیجې کمښت به هم د ژوند د لاسه ورکولو او هم د معشیت لاسه ورکولو سبب شي او پرمختیايي لاس ته راوړنې د ګواښ سره مخ کوي".
د ملګرو ملتونو دغه چارواکي وویل چې افغانستان د یو سخت بشري بحران سره چې د اوږدې جګړې څخه د زیږیدلو عواملو، بې وزلۍ، د اقلیم د بدلون څخه راپورته شوي ټکانونه او د ساتنې د راپورته کیدونکي خطرونو سره په ځانګړي ډول د ښځو او نجونو لپاره مخ دی. په دغه هیواد کې ۲۳ میلیونه وګړي بشري مرستو باندې متکي دي.
سټیفن دوجاریک ویلي چې دا شمیر د سوډان وروسته په نړۍ کې تر ټولو لوړ شمیر دی. په سوډان کې ۳۰ میلیونه وکړي پر بشري مرستو باندې متکي دي.
سټیفن دوجاریک وویل: "زمونږ د بشري مرستو شریکانو دا یادونه کړې چې په افغانستان کې د خوړو نه خوندیتوب او خوارځواکي دواړه په کلکه په لوړه کچه پاتې دي. د روان کال په لومړۍربع کې نږدې ۱۵ میلیونه کسان – هرو دریو افغانانو کې یو – به په ډیره لوړه کچه د خوړو نه خوندیتوب تجربه کړي".
د ملګرو ملتونو د معلوماتو له مخې تمه ده چې په روان کال کې به د پنځه کلنو څخه د کم عمر له ۳.۵ میلیون ماشومان او د یو میلیون څخه زیاتې امیدواره او ماشومانو ته شیدې ورکوونکې میندې د خوارځواکۍ د لوړې کچې ناروغۍ باندې اخته شي.
همداشان ملګري ملتونه وايي چې په افغانستان کې ناچاودو توکو خطرونه لا همغسې پاتې دي چې له امله یې د اټکل له مخې هره میاشت تر ۵۵ پورې کسان مړه او یا ټپیان کیږي، چې اکثره یې ماشومان دي.
د ملګرو ملتونو د عمومي منشي ویاند په افغانستان کې د بودیجې د کمښت ستونزې ته په کتنې ویلي چې ډیرو زیاتواړمنو کسانواو ټولنو ته د مرستو د دوام لپاره یې خپلو پروګرامونو لومړیتوب ته بیا کتنه کړې ده.
په دې پروګرامونو کې د ګاونډیو هیوادونو څخه ستنیدونکي افغان کډوال او د روانو بارونو او سیلابونو له امله چې په راروانو میاشتو کې یې تمه کیږي مخ ته کیدونکو اړتیاو د زیاتیدو پروګرامونه شامل دي.
هغه وویل چې ملګرو ملتونو د بودیجې دغه کمښت ته په کتنې پریکړه کړې چې د ملګرو ملتونو د بیړنۍ مرکزي غبرګون د بودیجې (CERF) څخه په افغانستان کې دغو لومړیتوبونو لپاره ۳۰ میلیونه ډالر ځانګړي کړي.
ددې دمخه ملګري ملتونو ویلي وو، چې په افغانستان کې خپلو پروګرامونو ته د نړیوالې ټولنې له خوا د لازمې بودیجې د نه برابریدو له امله میلیونونو افغانانو ته د خوړو او روغتیايي مرستو په ګډون د مرستو بندیدو ته اړ شوي دي.
ملګري ملتونو ویلي وو چې په تیرو دوو کلنو کې یې په افغانستان کې اړمنو افغانانو ته د بشري مرستو د دوام لپاره اړینه بودیجه نه ده ترلاسه کړې. افغانستان کې د بودیجې د کمښت ستونزه وروسته له هغې ډیره زیاته شوه چې د امریکا متحده ایالاتو د خپلو بهرنیو مرستو د ارزونې لپاره بهرنۍ مرستې د ۹۰ ورځو لپاره وځنډولې.
د ملګرو ملتونو د وګړو صندوق ویلي چې ددغو مرستو د ځنډیدو له امله په افغانستان او پاکستان کې افغانانو لپاره یې د خیر ښیګڼې ځینې پروګرامونه تړل شوي دي.
فورم \ دبحث خونه