د روغتیا نړیوال سازمان (WHO) په افغانستان کې د تنفسي ناروغیو له امله د مړو شویو کسانو د شمیر د زیاتیدو خبر ورکړی او ویلي دي چې یوازې د ۲۰۲۵ کال د جنورۍ په میاشت کې په دغه هیواد کې پر دغې ناروغۍ تر ۵۰۶ تنو پورې ناروغانو خپل ژوند له لاسه ور کړی دی.
دغه سازمان د سه شنبې په ورځ مارچ څلورم ( کب ۱۴) په یو راپور کې ویلي چې ددغې میاشتې په ترڅ کې له ۲۰۶ زرو څخه زیات کسان پر تنفسي ناروغیو اخته شوي دي.
د روړغتیا د نړیوال سازمان د راپور پراساس ددغو کسانو له ډلې د جنورۍ په میاشت کې ۵۰۶ ناروغانو خپل ژوند له لاسه ورکړی، چې د تیر ۲۰۲۴ کال د ډسمبر د میاشتې پرتله ۰.۲ فیصده زیاتوالی ښيي.
ددې راپور له مخې د جنورۍ په میاشت کې د تنفسي ناروغیو د ناروغانو شمیر د تیر ۲۰۲۴ کال د ډسمبر د میاشتې پرتله ۵۴ فیصده زیات وو.
د روغتیا نړیوال سازمان ویلي چې د ټټر د ناروغۍ په ګډون د سختې تنفسي ناروغۍ د ناروغانو د شمیر د زیاتیدو سره همهماله اړتیا ده چې په ټول افغانستان کې ناروغانو ته د روغتیايي پاملرنې خدمتونه زیات شي.
همداشان دغه سازمان د تنفسي ناروغۍ د مخنیوي لپاره په افغانستان کې د واکسین د تطبیق پر دوام باندې ټینګار کړی دی.
په راپور کې ویل شوي: "د روغتیا نړیوال سازمان د ۲۰۲۵ کال د جنورۍ په میاشت کې په افغانستان کې د روغتیايي پاملرنې په برخه کې د پام وړ پرمختګونه رامنځ ته کړي، په ۲۰ ولایتونو کې یې د ۱۳۱ لومړنیو روغتیايي مرکزونو څخه ملاتړ کړی او په اوو ولایتونو کې د ساري ناروغیو، بیړني حالاتو او روحي ناروغیو د درملنې په ګډون په نهو روغتونونو کې د روغتیايي خدمتونو د وړاندې کولو وضعیت کې ښه والی راوستی دی".
د شري د ناروغۍ د پيښو زیاتوالی
د روغتیا نړیوال سازمان ویلي چې په افغانستان کې یې د شري د ناروغۍ په زرګونو نوې پیښې ثبت کړي دي چې ددغې ناروغۍ دا پیښې د تیرو میاشتو پرتله د پام وړ زیاتوالی ښيي.
ددغه سازمان د راپور پراساس یوازې د روان کال د جنورۍ په میاشت کې د شري ۷۳۰۳ مشکوکې پیښې ثبت شوي چې د تیر ۲۰۲۴ کال د ډسمبر د میاشتې پرتله ۷۱.۴ فیصده زیاتوالی په کې راغلی دی.
د روغتیا د نړیوال سازمان د وینا پراساس په دغه میاشت کې د شري په ناورغۍ د ۴۲ کسانو د مړینې پیښې یې هم ثبت کړي دي.
ددې دمخه د روغتیا نړیوال سازمان ویلي و، چې د ژمي د موسم په رابره کیدو سره په سړو او لیرو پرتو سیمو کې روغتیايي ستونزې په ځانګړي ډول د لوړ عمر کسانو او ماشومانو ترمنځ تنفسي ناروغۍ زیاتیږي.
د روغتیا د نړیوال سازمان ویلي و، چې د افغانستان په ځینو برخو کې روغتیايي خدمتونو ته د ښځو او نجونو لاس رسی محدود شوی دی.
دغه سازمان ویلي چې افغانستان کې ۲۳.۷ میلیون وګړي چې ددغه هیواد نیمايي نفوس جوړوي بشري مرستو ته اړتیا لري.
د روغتیا د نړیوال سازمان د راپور پراساس اوس مهال په افغانستان کې ۱۲.۴ میلیون وګړي د خوړو د نه خوندیتوب سره مخ دي او ددغه شمیر ۲.۹ میلیونه کسان په لوړه کچه د لوږې حالت تجربه کوي.
فورم \ دبحث خونه