د افغانستان جمهوري ریاست وايي چې اوربند د سولې د خبرو د پیل لپاره د افغان حکومت طرح ده او په دې بهیر کې د تاوتریخوالي کمول عملي بڼه نه لري.
د ارګ ویاند صدیق صدیقي د یکشنبې په ورځ د جنوري په ۱۲مه (مرغومي ۲۲مه) په خپل ټویټر کې لیکلي چې له اوربند څخه د افغان حکومت هدف د تیر درې ورځني اوربند په څیر د افغانستان د دولت او طالبانو ترمنځ توافق دی.
هغه ټینګار کړی: "د تاوتریخوالي کمول کره پوځي، حقوقي معنی او عملي بڼه نه لري، له اوربند څخه زموږ هدف د هغه اوربند په څیر دی چې دوه کاله مخکې د اختر په ورځو کې وشو او ښکاره تعریف یې درلود."
د جمهوري ریاست د ویاند پر وینا د افغانستان لپاره سوله د جنګ د پای ته رسېدو په معنی ده او د سولې د خبرو په اړه هر ډول طرح چې وړاندې کېږي باید وضاحت ولري.
ښاغلي صدیقي لیکلي: "اوربند یوه نړیواله تجربه ده، زموږ لپاره د سولې تامینېدل د جګړې د پای په معنی ده، د بیلابیل ډوله تاوتریخوالي رامنځ ته کول په جګړې پورې تړاو لري. اړتیا ده چې وړاندې شوې طرحې وضاحت ولري".
طرح حکومت افغانستان برای آغاز گفتگوهای صلح، تامین آتش بس است. کاهش خشونت معنای دقیق نظامی، حقوقی و جنبهی عملی ندارد.هدف ما از آتش بس، همانند آتش بسی است که دوسال پیش؛ در روزهای عید درکشور برقرار شد و تعریف واضح داشت.
— Sediq Sediqqi (@SediqSediqqi) January 12, 2020
د افغانستان جمهوري ریاست په داسې حال کې د سولې په بهیر کې د تاوتریخوالي د کمولو غوښتنه عملي نه ګڼي، چې د افغانستان د سولې په چارو کې د امریکا ځانګړي استازي په قطر کې له طالبانو سره د سولې د خبرو پر مهال له دغې ډلې څخه په افغانستان کې د تاوتریخوالي د کمولو غوښتنه کړې.
طالب استازو د امریکايي لورې له خوا د تاوتریخوالي د کمولو غوښتنې په اړه له خپلو مشرانو سره بحثونه وکړل او د هغوی له سلامشورو وروسته یې په دې برخه کې د طالبانو دریځ د امریکا له استازي زلمي خلیلزاد سره په قطر کې شریک کړل.
امریکايي او طالب استازي له شاوخوا یوې اونۍ راهیسې په قطر کې په مذاکراتو بوخت دي.
اټکل کیږي چې د سولې د خبرو په دغه پړاو کې به د امریکا او طالبانو استازي "د تاوتریخوالي په کمولو، اوربند او بین الافغاني مذاکراتو" په اړه خبرې وکړي او ښايي چې په دې اړه یوې نتیجې ته ورسیږي.