د استرالیا کرکټ بورډ د سه شنبې په ورځ مارچ ۱۱ (کب۲۱) اعلان وکړ چې د استرالیا او انګلنډ د نارینه وو لوبډلو ترمنځ د ټست۱۵۰مه سیالي به د میلبورن کرکټ ګراونډ (ام سي جي) کې وشي.
دا به لومړۍ ځل وي چې په دغه لوبغالي کې، چې د شاوخوا ۱۰۰زره نندراچیانو د ناستې ځای لري، د نارینه وو لوبډلو د ټست لوبه د شپې کیږي.
دا پنځه ورځنۍ لوبه د ۲۰۲۷ کل د مارچ د ۱۱مې او ۱۵مې نېټو ترمنځ پلان شوې ده. لوبه به له غرمې وروسته پیل کېږي او د شپې تر ناوخته پورې به روانه وي.
د دغو دواړو هېوادونو ترمنځ لومړۍ ټست لوبه هم په ۱۸۷۷ کال کې په ام سي جي کې شوې وه.
د ټست لوبو ۱۰۰مه سیالي هم په ۱۹۷۷ کال کې په ام سي جي کې شوې وه چې استرالیا په ۴۵ منډو ګټلې وه.
د استرالیا کرکټ بورډ مشر ټوډ ګرینبرګ وویل: «په ام سي جي کې به د ټست ۱۵۰مه لوبه د کرکټ یوه لویه پېښه وي. تر څرغونو لاندې (شپه کې) په لوبې کولو سره به هم د کرکټ غني میراث او هم به د کرکټ معاصر تکامل ونمانځو.»
د روان کال د فبرورۍ په میاشت کې د انګلنډ او استرالیا د ښځو لوبډلو هم په ام سي جي کې په شپې کې د ټست لوبې وکړې چې استرالیا وګټله.
انګلنډ او استرالیا په کرکټ کې دوه سر سخت رقیبان بلل کېږي. د دواړو هېوادونو ترمنځ د «اشیز ټست» یو لړ سیالۍ هم کېږي چې ډېر مینه وال لري.
ټاکل شوې د انګلنډ د کرکټ لوبډله استرالیا ته د «اشیز ټست» پنځو لوبو لپاره د روان کال د نومبر په میاشت کې استرالیا ته ولاړ شي.
استرالیا څه موده مخکې په خپل کور کې له هند څخه د پنځو ټست لوبو لړۍ وګټله.