د افغانستان پخواني ولسمشر حامد کرزي د پاکستان سره د ډیورنډ په کرښه د کټارو لگولو سره د امریکا په مالي مرستو اندیښنه ښودلې
ښاغلي حامد کرزي د اگست په ٦ نیټه په یو ټویټ کې لیکلي دي چې د پاکستان سره د ډیورنډ په کرښه د کټارو په لگولو کې د امریکا مالي مرستې د اندیښنې وړ عمل دی. هغه دغه عمل وغنده او دا یې د افغانستان د ملي حاکمیت نه سرغړونه وبلله.
حامد کرزی په خپل ټویټ کې لیکي
Hamid Karzai is deeply concerned over the US financial assistance to Pakistan for fencing the Durand Line. While condemning the move and calling it a violation of our rights and sovereignty, the former President said, “The US funding to Pakistan for fencing the Durand line is...
— Hamid Karzai (@KarzaiH) August 6, 2018
"د پاکستان سره د ډیورنډ په پولې د کټارو د لگولو لپاره د امریکا مالي مرستې د پاکستان د هغه پالیسۍ سره مرسته ده چې غواړي د پولې دواړو خواو ته پراته افغانان بیل کړي."
ښاغلي کرزي زیاته کړه چې د ډیورنډ کرښه بریتانوي استعمار په مونږ تپلي ده او دغه نه افغانانو منلې ده او نه به یې ومني.
د پاکستان حکومت د تیرو څو کلونو راهیسې د ډیورنډ د کرښې سره په نژدې سیمو کې د ترهگرۍ ضد عملیات کوي او وایي چې د ترهگرو د ازادانه تگ راتگ د مخنیوې لپاره د افغانستان سره په پولې کټارې لگوي.
د ډیورند کرښه شاوخوا ۱۵۰۰ کیلو متره ده چې د پاکستاني چارواکو په وینا د اغزنو کټارو په لګولو باندې پرې ۴۸۳ میلیون ډالر لګښت راځي.
پاکستان دغه کار پیل کړیدی خو پدغه موضوع د افغانستان حکومت د پاکستان سره هیڅ موافقه نده کړې او د دغه کار یې یواړخه بللی.
د یادونې وړ ده د پاکستان نوی انتخاب شوی صدراعظم عمران خان د انتخاباتو د گټلو نه وروسته ملت ته په خپلې لمړنۍ وینا کې وویل چې د افغانستان سره خلاص سرحد غواړي چې د دواړو ملکونو خلک په اسانه د یوبل ملک ته تگ راتگ ولري.