د نوبل جایزې ګټونکی محمد یونس د پنجشنبې په ورځ اګست اتمه (زمري ۱۸) بنګله دیش ته ستون شو چې د پخوانۍ صدراعظمې شیخ حسینې د واک څخه له ګوښه کیدو وروسته د موقت حکومت مشري وکړي.
یونس له پاریس څخه په الوتکه کې د ډهاکې په حسرت شاهجلال نړیوال هوايي ډګر کې راښکته شو او د بنګله دېش د پوځ مشر جنرال وقار زمان او نورو لوړ پوړو پوځي افسرانو یې هرکلی وکړ.
یونس په هوايي ډګر کې یوې خبري غونډې ته وویل: "نن زموږ لپاره د ویاړ ورځ ده. بنګله دیش د بریا یوه نوې ورځ نمانځي. بنګله دیش دوهمه خپلواکي ترلاسه کړه."
دغه ۸۴ کلن مشر د پنجشنبې په شپه د بنګله دېش د موقت حکومت د مشر په توګه لوړه وکړه.
یونس په بنګله دېش کې د پراخو مظاهرو وروسته واک ته رسیږي چې په نتیجه کې یې پخوانۍ صدراعظمه شیخ حسینه له واک څخه لرې شوه.
په بنګله دېش کې ناکرارۍ په حکومتي دندو کې د سهمیې د سیستم په خلاف د لاریونونو سره پیل شوې. مظاهره کوونکو د حسینې له واک څخه لیرې کېدل وغوښتل. د هغې د اوږدې مودې په واکمنۍ باندې د بشري حقونو د سرغړونو او په ټاکنو کې د درغلیو تورونه لګول شوي دي.
په بنګله دېش کې د یوې میاشتې مظاهرو او ناکراریو په ترڅ کې لږ تر لږه ۳۰۰ کسان ووژل شول.
دا مطلب هم ولولئ په بنګله دېش کې محصلینو بیا مظاهرې پیل کړې؛ حکومت یې غوښتنې نه دي منلې
وقار زمان د چهارشنبې په ورځ په یوه تلویزیوني وینا کې وویل چې د ناکراریو له مسئولو کسانو سره به حساب کتاب وکړي.
ولسمشر محمد شهاب الدین چې تشریفاتي دنده لري، د سه شنبې په ورځ پارلمان منحل کړ. دې اقدام یونس لخوا د موقت حکومت د مشرۍ کولو لاره هواره کړه. په بنګله دېش کې د نویو ټاکنو وخت ناڅرګند دی.
اقتصادپوه محمد یونس په ۲۰۰۶ کې د نوبل جایزه ترلاسه کړه هغه د کوچنیو پورونو له لارې د بې وزلۍ د کمولو په هلو ځلو مشهور دی.
یونس د بنګله دېش د مشر په توګه د ټاکل کیدو راهیسې په خپله لومړنۍ وینا کې، په وروستیو لاریونونو کې د محصلینو د رول ستاینه وکړه او د ارامۍ غوښتنه یې وکړه. هغه ټینګار وکړ چې نور باید له تاوتریخوالي ډډه وشي او د هېواد پر بیارغونې تمرکز وشي.
دا مطلب هم ولولئ د بنګله دېش د 'بیګمانو جګړه'؛ یوه یې وتښتېده او بله یې ازاده شوه
بل خوا د پخوانۍ صدراعظم خالدې ضیاء د "بنګله دېش ملي ګوند" ملاتړو په پایتخت ډهاکه کې لاریون کړی او د هغې واک ته رسېدل یې غوښتي دي. خالده ضیا تازه په کور کې له نظربندۍ خوشې شوې ده.
خالده ضیاء چې له ۲۰۰۱ څخه تر ۲۰۰۶ پورې یې د صدراعظمې په توګه دنده ترسره کړې، په ۲۰۱۸ کال کې د فساد په تور په ۱۷ کاله بند محکومه شوه. د هغې ګوند ادعا کوي چې پر هغې باندې دا تورونه سیاسي انګیزه لري.
په ډهاکې کې د خالدې ضیاء د ملاتړو مظاهره په بنګله دېش کې د پراخېدونکي نوي سیاسي وضعیت ښکارندويي کوي.
پخوانۍ صدراعظمه شیخ حسینه د جنوري په میاشت کې د څلورم ځل لپاره وټاکل شوه. هغه په ټاکنو کې د درغلیو له تورونو سره مخامخ شوې. متحده ایالاتو او بریتانیې ددغو ټاکنو پایلې غندلې وې.
د چهارشنبې په ورځ، ډهاکه له څه باندې یوې میاشتې تاوتریخوالي وروسته نسبتا ارامه وه. د پولیسو شتون لږ وو او د محصلینو یو شمېر رضاکاران لیدل کېدل چې د سړکونو په پاکولو او د ترافیک په اداره کولو بوخت وو.