د امریکا جمهور رئیس دونالد ټرمپ ویلي دي چې د طالبانو په تاوتریخوالي کې د "پام وړ" کچې کموالي غوښتنه کوي.
ښاغلي ټرمپ د چهارشنبې په ورځ (جنورۍ ٢٢) د اقتصاد د نړیوالې غونډې په څنډه کې د افغانستان د جمهور رئیس محمد اشرف غني سره په کتنه کې، د تاوتریخوالي د کمیدو په اړتیا او "بامفهومه مذاکراتو" ته د زمینې په برابریدو ټینگار وکړ.
سپینې ماڼۍ د یوې خبر پاڼې په خپرولو سره ویلي دي: "ښاغلي ټرمپ د طالبانو له لورې د تاوتریخوالي د پام وړ او دوامداره کموالي پر ضرورت ټینگار وکړ چې د افغانستان د راتلونکې لپاره به بامفهومه مذاکراتو ته زمینه برابره کړي."
جمهور رئیس غني هم په خپل ټویټر د یو پیغام په خپرولو سره ویلي چې د ښاغلي ټرمپ سره په کتنه کې یې د دوی د پخوانیو بحثونو په اساس چې په بگرام کې شوي وو، د مختلفو مسایلو په اړه خبرې کړې دي.
Today, I met with Pres @realdonaldtrump on the sidelines of the World Economic Forum in Davos. We followed up on various issues based on our previous discussions from our last meeting in Bagram. The Afghan government will continue these discussions with NSA Robert O’Brien. pic.twitter.com/vJBlaVAgu6
— Ashraf Ghani (@ashrafghani) January 22, 2020
ښاغلي غني په خپل ټویټر لیکلي چې د افغانستان حکومت به دغه ډول بحثونو ته د امریکا د ملي امنیت د مشاور رابرت اوبراین، سره دوام ورکړي.
وروسته له هغې چې طالبانو د تاوتریخوالي کمولو ته تیاری وښود، د افغانستان جمهوري ریاست وویل چې د تاوتریخوالي کمول کوم څرگند او عملي تعریف نلري او د رغنده مذاکراتو د پیل لپاره یواځنۍ عملي لار اوربند دی.
د امریکا د متحده ایالاتو جمهور رئیس پداسې حال کې د طالبانو له لورې د تاوتریخوالي په کمولو ټینگار کوي چې ددې ډلې استازي د څو اونیو راهیسې په قطر کې د افغانستان د سولې لپاره د امریکا د ځانگړي استازي زلمي خلیلزاد سره په مذاکراتو بوخت دي.