په افغانستان کې د طالبانو لخوا په ښځو باندې د محدودیتونو په اړه د افغانستان لپاره د اروپايي ټولنې ځانګړی استازی وايي چې افغان نجونې باید ښوونځيو ته ولاړې شي او ښځې خپلو کارونو ته دوام ورکړي.
توماس نیکلاسن د چهارشنبې په ورځ جون لومړۍ (غبرګولې ۱۱) په خپل ټویټر پاڼه لیکلي هغه ناسته چې د قزاقستان په کوربتوب په هغه هیواد کې وشوه، د افغانستان د وضعیت په اړه بحثونه وشول.
په دغه ناسته کې د اروپايي ټولنې د استازو تر څنګ د مرکزي اسیا هیوادونو چارواکو د افغانستان لپاره د ملګرو ملتونو د سیاسي استازولۍ مشرې دیبرا لاینز هم ګډون کړی و.
ښاغلي نیکلاسن زیاته کړې: "ښځې او نجونې باید وکولای شي چې ښوونځي ته ولاړې شي،په عمومي ژوند کې بشپړ مشارکت ولري. موږ د افغانستان اقتصادي ستونزو ته د رسېدو لپاره د نړیوالې ټولنې د ابتکاراتو ستاینه کوو او د سیمې د ثبات د اهمیت لپاره د خبرو پر دوام مو ټینګار وکړ."
Women and girls must be able to attend school, work and participate fully in public life. We acknowledged initiatives by the international community to address challenges facing the Afghan economy, and reiterated the importance of regional stability and of continued dialogue.
— Tomas Niklasson (@tomas_niklasson) June 1, 2022
په داسې حال کې چې پر افغانستان د طالبانو د حاکمیت څخه نهه میاشتې تیریږي، د نجونو لپاره د ښوونځيو د متوسطې او لېسې دروازې بندې دي او د طالبانو حکومت د خپلې ژمنې خلاف د نوي تعلیمي کال په لومړۍ ورځ د ورې میاشتې پر دریمه نېټه، یو ځل بیا اعلان وکړ چې دنجونو تر شپږم پورته ټولګي به تر بلې خبرتیا پورې بند وي.
په همدې مهال د افغانستان د بشري حقونو څار بنسټ ویلي، په داسې حال چې طالبانو د نجوونو ښوونځيو پرانیستلو په اړه یوه نهه کسیزه کمېټه رامنځته کړې، خو وايي چې تر اوسه یې د دغه کمېټې د کار پیلولو په اړه معلوت نسته.
دغه بنسټ زیاته کړې: "طالب چارواکو څو ځله ویلي چې د نجونو ښوونځي به ژر پرانیستل شي، خو ۲۵۶ ورځې تیریږي چې نجونې نشي کولای ښوونځیو ته ولاړې شي."
تر دې مخکې د امریکا متحده ایالاتو په ګډون، اروپايي ټولنې، د ملګرو ملتونو نړیوال سازمان او د ښځو د ملاتړ نورو بنسټونو هم له طالبانو څخه په ټینګه غوښتي وو چې د ښځو په وړاندې خپل سیاستونه بدل کړي او د نجونو پر مخ تر شپږم پورته ټولګي هم پرانیزي.
د افغان نجونو او ښځو د حقوقو په برخه کې د امریکا متحده ایالاتو ځانګړي استازي رینا امیري تر دې مخکې ویلي وو که طالبان نړیوال مشروعیت غواړي باید د ښځو حقوقو ته درناوی وکړي.