د کندهار د امنیه قوماندان وایي مرکزي حکومت انتخابي ندی او د خلکو د مشورې په بنسټ جوړ شوی او د کندهار د امنیه قوماندانۍ له مقام نه "هغه نشي گوښه" کولای.
د افغانستان د قوانینو له مخې، مرکزي حکومت صلاحیت لري چې والیان او د ولایتونو امنیه قوماندانان وټاکي او یا له کاره گوښه کړي.
جنرال عبدالرازق د امریکا غږ اشنا رادیو د خبریال عزیز پوپل سره په مرکه کې وویل "زه د کندهار د خلکو په غوښتنه په دغه مقام ټاکل شوی یم او د هغوی په وړاندې ځوابگویه یم."
ښاغلي رازق ټینگار وکړ که په دې پوه شي چې د کندهار د امنیه قوماندانۍ نه یې گوښه کیدل "سوله رامنځ ته کوي او د طالبانو د راتگ سبب کیږي" حاضر دی چې ددې مقام نه گوښه شي.
جنرال عبدالرازق د سه شنبې په شپه ادعا وکړه چې "په مرکزي حکومت کې ځنی عناصر غواړي د کندهار او بلخ په شان ولایتونو نه د یو شمیر افرادو په لرې کولو سره، ناپاک کسان دلته وټاکي چې ناامني زیاته شي، انتخابالت ونه شي او خلک ساه ونه باسي".
د ښاغلي رازق دغه دریځ د کابل او بلخ ترمنځ د کړکیچ وروسته نیول کیږي چې مرکزي حکومت د بلخ له ولایت نه ظحمد عطا نور گوښه کړی او پر ځای بل شخص ټاکلی دی.
د امریکا غږ د خبریال عزیز الله پوپل سره د جنرال عبدالرازق مرکه دلته اوریدای شئ:
په یو نوي غبرگون کې ښاغلی نور د شنبې په ورځ د بلخ ولایت مقام ته لاړ او پر خپل مقام یې ټینگار وکړ او وویل چې هیڅ مقام نشي کولای چې هغه گوښه کړي.
د امریکا غږ د یوې پوښتنې په ځواب کې جنرال رازق د ښاغلي نور سره هر ډول مالي ارتباط درلودل رد کړل او وویل چې "د ٢٠٠٩ او ٢٠١۴ کلونو د انتخاباتي دورې په ترڅ کې د ښاغلي نور څرگندونې وگورئ چې څومره یې پر ما باندې انتقادونه کړي دي.
ښاغلي رازق وویل هغه د ښاغلي نور "دوست" دی او دواړه د افغانستان د مخالفانو سره مخامخ دي او "چاته په دې هیواد کې د ورانکاریو اجازه نه ورکوي".
