په افغانستان کې د جګړې د پای ته رسېدو او سولې ټینګېدو لپاره تیره شپه د بین الافغاني مذاکراتو دوهم پړاو پيل شو.
د افغانستان د اسلامي جمهوریت او طالبانو مذاکراتي پلاوو د جنورۍ ۹ (مرغومې ۲۰) پر خپل ټویټر لیکلي چې یاده غونډه کې د اجنډا د توحید او ترتیب په اړه بحثونه وشول.
"نن ماښام د بین الافغاني مذاکراتو دواړو خواوو د مذاکراتو د اجنډا د توحید او ترتیب لپاره د دواړو هیأتونو د ټاکل شویو ګروپونو د تېری چهارشنبې د مجلس د پرېکړې پر اساس جلسه درلودله. په غونډه کې چې په ښه فضا کې تر سره شوه د اجندا د توحید او ترتیب په هکله بحثونه وشول او پرېکړه وشوه چې دغه ناستې به دوام مومي."
د دوی د معلوماتو په اساس پرېکړه شوې چې ورته ناستې به دوام پيدا کړي.
د افغانستان د اسلامي جمهوریت مذاکراتي پلاوی په دوهم پړاو بین الافغاني مذاکراتو کې د ګډون لپاره د تیرې سې شنبې به ورځ دوحې ته ورسېد.
افغان ولسمشر محمد اشرف غني، د امریکا متحده ایالاتو او ملګرو ملتونو په دوحه کې د دوهم پړاو مذاکراتو پیلېدو هر کلی دی.
امریکا او ملګرو ملتونو ویلي چې له رامنځته شوي فرصت څخه باید په افغانستان کې د جګړې د پای ته رسېدو او سولې ټینګېدو لپاره زیاته ګټه واخیستل شي.
ولسمشر غني هم د یادو مذاکراتو مثبتې پایلې ته هیله ښودلې ده.
ټولو لورو هیله ښودلې چې د دوهم پړاو مذاکراتو په پیلېدو سره په افغانستان کې د تاوتریخوالي کچه راټیټه او دواړه مذاکراتي پلاوي د اوربند پر سر هوکړي ته ورسیږي.
دوهم پړاو بین الافغاني مذاکرات پر داسې مهال پیل شول چې نن یکشنبه په کابل ښار کې په ماین چاودنه کې د افغانستان د عامه ساتنې تصدۍ د ویاند په ګډون درې تنه ووژل.
تر دا مهاله ددغه چاودنې مسؤلیت کومې وسله والې ډلې نه دی منلی.
