په یمن کې په یو بس موټر په هوایي حملې کې په لسگونو کسان وژل شویدي چې پکې ماشومان هم شامل دي.
د سره صلیب نړیوالې ادارې او په یمن کې د صحت وزیر وایي چې د سدا په صوبې کې په یو بس موټر هغه وخت هوایي برید وشو چې دغه بس په یو بازار کې روان و.
د سره صلیب نړیوالې ادارې په خپل ټویټر یې لیکلې دي "زمونږ روغتون ته د ٢٩ ماشومانو جسدونه راوړل شویدي چې عمرونه یې د ١٥ کلو نه کم دي. روغتون ته ۴٠ تنه زخمیان هم راوړل شویدي چې په هغې کې ٣٠ ماشومان دي."
د یادونې وړ ده چې دا یواځې د یو روغتون راپور دی.
په یمن کې د سعودي په مشرۍ پوځي ائتلاف د څو کلونو راهیسې د حوثي یاغیانو خلاف جنگیږي. ائتلاف ویلي چې دغه برید یې د یو توغندي د ویشتلو په هدف کړی و چې پکې یو ملکي وژل شویدی.
دغه ائتلاف په حوثي یاغیانو تور لگولی دی چې د ماشومانو نه د انساني سپر په توگه کار اخلي او وایي چې برید یې د نړیوالو قوانینو سره سم و.
د حوثیانو ویاند محمد عبدل السلام وایي چې په بازار دغه ډول برید څرگندوي چې دغه ائتلاف د انسانانو ژوند ته هیڅ ارزښت نه ورکوي.
د یمن د روغتیا د وزارت ویاند عبدل غني رویټرز ته ویلي "یو بس موټر چې ماشومان پکې سپاره و، هغه وخت په نښه شویدی چې ماشومان یې د ښوونځي نه بیرته وړل، په دغه پیښه کې ۴٣ تنه وژل شوی او ٦٣ زخمیان دي."
د رویټرز خبریال لیکي چې په روغتونو کې زخمي ماشومان چې په خپلو وینو کې ککړ راوړل شویدي، چغې وهي, فریادونه کوي او ډاکټران یې په علاج بوخت دي.
