د امریکا د متحدو ایالتونو سنا د دغه هېواد د سترې محکمې غړیتوب ته د ولسمشر ټرمپ نوماندې امي باریت ته د تائیدۍ رایه ورکړه.
سنا له څو ورځو استماعیه غونډې او پوښتنو وروسته د دوشنبې په ورځ اکتوبر ۲۶ (لړم ۵) ناوخته د هغه د تائید او رد لپاره رایه واچوله.
په سنا کې ټول ۱۰۰ غړي دي چې ۵۳ یې د جمهوري غوښتونکي ګوند استازي دي.
مېرمن باریت ۵۲ د تائید رایې ترلاسه کړې او په دې حساب د امریکا د متحدو ایالتونو د سترې محکمې نهمه غړې شوه.
د امریکا په سنا کې جمهوري غوښتونکي اکثریت دی او له اول نه هم ویل کېدل چې هغه به د تائید رایه واخلي.
سناتوره سوزان کولینز د جمهوریت غوښتونکو یوازینۍ غړې وه چې مېرمن باریت ته یې د تائید رایه ورنکړه.
سوزان کولینز وايي چې انتخابات نژدې دي او دا نغواړي چې په داسې یو وخت کې دا ډول رایه ورکړي.
د دموکرات ګوند غړو هم ټېنګار کاوه چې باید د سترې محکمې غړیتوب ته د ولسمشرۍ له ټاکنو وروسته بریالی ولسمشر یو کس معرفي کړي.
اسوشیتډپرس وايي په تېرو ۱۵۰ کلونو کې دا لومړی ځل دی چې د امریکا سنا کې د سترې محکمې غړیتوب ته نوماند/نوماندې ته د بل ګوند غړو د تائیدۍ هېڅ رایه ورنکړه.
امی باریت د امریکا د متحدو ایالتونو د سترې محکمې د یوې بلې غړې روت بدر ګینزبرګ چې څه موده مخکې د سرطان له کبله مړه شوه، په ځای ټاکل شوې ده.
د امریکا ستره محکمه نهه غړې لري چې په دې سره یې شپږ غړي محافظه کاران شول.
د قانون له مخې دوی باید د هېڅ یو سیاسي ګوند غړي نه وي او د ژوند تر پایه به د سترې محکمې غړې وې.
