د برمته شویو کسانو په چارو کې د متحده ایالاتو ځانګړي استازي، ایډم بویهلر چې د حماس ډلې سره یې په بې سارې توګه مخامخ خبرې کړي، ډاډ څرګند کړی چې په غزې کې د اسرائیلي برمته شویو کسانو خوشې کیدو لپاره موافقه ښایي په څو اوونیو کې وشي.
ښاغلي بویهلر چې پخپله یې هم یهود دی، یکشنبه مارچ نهمه ( کب ۱۹) یې د سي ان ان تلویزیوني شبکې سره په مرکې کې د حماس سره مخامخ خبرې " ډیرې ګټورې" وبللې او دا امکان یې هم رد نکړ چې ښایي نور دا ډول لیده کاته به وشي.
د متحده ایالاتو استازي پخپلو خبرو کې ومنله چې اسرائیل د حماس ډلې سره د متحده ایالاتو د مستقیم ملاقات په هکله اندیښنه څرګنده کړې خو وړاندې یې وویل چې دا ملاقات یې د خبرو اترو پیل کیدو په هدف کړی.
هغه زیاته کړه، " په نهایت کې، زه فکر کوم دا یو ګټور ملاقات و. زه فکر کوم یو څه ( موافقه) ښایي په څو اوونیو کې وشي. زه فکر کوم یوه موافقه شته چې هغوي نه یوازې امریکایان بلکې ټول بندیان راخوشې کړي".
بویهلر د حماس ډلې سره د مخامخ ملاقات په هکله د اسرائیل اندیښنو په هکله وویل، " مونږ متحده ایالات یو. مونږ د اسرائیل اجنټان نه یو".
د متحده ایالاتو دې جګپوړي چارواکي زیاته کړه چې د حماس ډلې سره مخامخ کښیناستل چې امریکا یې ترهګره ډله بولي، ورته آسان نه و.
هغه پدې هکله وویل، " زه فکر کوم کله چې تاسو د یو داسې چا سره مخامخ کښینۍ چې یو څه یې کړیدي، دا ډیره سخته ده". خو تر څنګ یې دا هم وویل چې مهمه ده د هغوي بشریت وپیژندل شي.
د متحده ایالاتو ځانګړي استازي داسې مهال دا څرګندونې کړي چې حماس او اسرائیل د اوربند دویم پړاو پر سر د خبرو لپاره چمتوالی ښودلی.
د حماس ویاند عبدالطیف القنوع تیره ورځ د مصر په پایتخت قاهرې کې د منځګړو هیوادونو د استازو سره د دې ډلې د استازو کتلو څخه وروسته په یوې اعلامیې کې وویل چې د اوربند پر سر د خبرو دویم پړاو پیل کیدو لپاره "مثبتې نښې" شته دي.
ښاغلي قنوع پرته لدې چې نور جزیات ورکړي او یا د مثبتو نښو په هکله نور ملومات ورکړي ویلي، " د مذاکراتو دویم پړاو پیل کیدو لپاره مثبت علایم شته دي."
د حماس یو لوړ پوړي پلاوي د شنبې په ورځ د مصر د چارواکو سره کتلي دي او ویل کیږي چې د خبرو هدف د اوربند دویم پړاو پیل کیدو په باره کې ددې ډلې نظر معلومول و.
د حماس په اعلامیې کې ویل شوي چې دا ډله د فلسطیني ولس د غوښتنو پوره کولو لپاره چمتو ده چې د اسرائیل سره د اوربند په دویم پړاو کې خبرې وکړي خو تر څنګ یې په منځګړو هیوادونو غږ کړی چې اسرائیل مجبور کړي د اوربند په لومړي پړاو کې خپلې کړې ژمنې پر ځای کړي.
په عین حال کې د اسرائیل د صدراعظم بنیامین نتنیاهو دفتر په یوې اعلامیې کې ویلي چې خپل یو پلاوی د همدې راتلونکې دوشنبې په ورځ د قطر پایتخت دوحې ته استوي چې د اوربند په خبرو کې برخه واخلي.
په اعلامیې کې ویل شوي چې اسرائیل د متحده ایالاتو له ملاتړ برخمنو منځګړو هیوادونو بلنه منلې او مذاکراتو مخته وړلو لپاره به خپل یو پلاوی دوحې ته واستوي.
د اسرائیل – حماس تر منځ د اوبند لومړي پړاو موده چې د متحده ایالاتو، مصر او قطر په منځګړتوب د روان میلادي کال د جنوري میاشتې په سر کې وشو، موده یې د همدې روانې مارچ میاشتې په لومړې نیټې پای ته ورسیده.
سره لدې په غزې کې اوربند پای ته رسیدلی خو بیا هم حماس او اسرائیل تر ډیره حده په یو بل ډزې ندي کړي.
اسرائیل غوښتل د اوربند لومړی پړاو د اپریل میاشتې تر نیمایي پورې ادامه پیدا کړي خو د حماس ډلې بیا ټینګار کاوه چې د دې اوربند دویم پړاو پر سر دې خبرې پیل شي چې ښایي په غزې کې د دایمي اوربند سبب شي.
د اوربند په لومړي پړاو کې د حماس ډلې ۲۵ ژوندي او د ۸ برمته شویو کسانو جسدونه اسرائیل ته وسپارل چې په بدل کې د اسرائیل حکومت د بیلا بیلو زندانونو څخه شاوخوا ۱۸۰۰ فلسطیني بندیان خوشې کړل.
فورم \ دبحث خونه